Me deklarata që ngrenë sërish tensionet në rajon, presidenti serb Aleksandër Vuçiq ka rikthyer në qendër të vëmendjes dy temat më të ndjeshme për politikën e jashtme të Beogradit: integrimin evropian dhe çështjen e Kosovës.
Në një intervistë për radiotelevizionin publik serb, Vuçiq u shpreh se beson se Serbia mund të bëhet anëtare e Bashkimit Evropian para vitit 2030, por theksoi me vendosmëri se ky proces nuk do të thotë se Beogradi do të heqë dorë nga qëndrimi i tij ndaj Kosovës.
“Unë besoj se ekzistojnë shanse të tilla. Por ekziston një çështje tjetër, çështja e Kosovës. Unë nuk mund dhe nuk do ta pranoj pavarësinë e Kosovës,” deklaroi Vuçiq.
E në lidhje me këtë deklaratë të Vuçiq foli avokati shqiptar, Spartak Ngjela, i cili e kritikoi ashpër presidentin serb.
Sipas tij, deklaratat e tilla nuk janë normale dhe janë një marrëzi e Vuçiqit.
“Nuk mund t’i diskutosh me një arsye normale ato rrjedhje mendore që konstatohen vijimisht te Vuçiq.
Ai është një kryeministër që përditë thotë: do të marr Kosovën, edhe pse e di që në Kosovë ka trupa nga NATO.
Dhe këtu mbyllet çdo diskutim për marrëzinë Vuçiq”, deklaroi Ngjela.
Deklarata e Vuçiq vjen në një kohë kur dialogu Kosovë–Serbi, nën ndërmjetësimin e Bashkimit Evropian, ndodhet në një ngërç të thellë dhe Brukseli po e bën gjithnjë e më të qartë se normalizimi i marrëdhënieve me Kosovën është kusht i domosdoshëm për çdo hap të mëtejshëm të Serbisë drejt integrimit evropian.
Megjithatë, Vuçiç vazhdon të ecë në vijën e hollë mes Lindjes dhe Perëndimit – duke u përpjekur të ruajë marrëdhënie të mira me Moskën dhe Pekinin, ndërsa në të njëjtën kohë deklaron publikisht se synon anëtarësimin në BE.
