Volejbollistes së Dinamos, Nayar Ferreira, i është kërkuar të i nënshtrohet testit të gjinisë, ndërsa mediat në Shqipëri raportuan të shtunën se ajo është suspenduar nga Federata Shqiptare e Volejbollit (FSHV).
Ky vendim dhe kërkesa për testimin e gjinisë janë iniciuar nga klubet kundërshtare të Dinamos.
Sipas mediave shqiptare, FSHV ka kërkuar analiza më të detajuara, ndërsa Ferreira ka deklaruar se ndihet e diskriminuar.
Ferreira u transferua te Dinamo në gusht të këtij viti dhe konsiderohet njëra prej lojtareve kryesore të ekipit.
32-vjeçarja ka zhvilluar karrierë edhe në Brazil, Francë, Spanjë, Çeki, Finlandë, Portugali dhe Arabinë Saudite.
Dinamo të premten mbrëma luajti ndaj Tiranës në ndeshjen e xhiros së shtatë të elitës së volejbollit, duke fituar me rezultatin 3:2 në sete.
Ferreira gjithashtu ishte pjesë e Dinamos edhe në ndeshjen miqësore ndaj Dritës së Gjilanit më 13 shtator në Rrëshen.
