Një aksident i rëndë trafiku ka ndodhur pasditen e së mërkurës në fshatin Bernjak të Rahovecit, ku një person ka humbur jetën.
Burime policore kanë bërë të ditur për Gazetën se viktima është Bashkim Haxhimustafa rreth 58-vjeçar, i cili po ngiste një traktor me rimorkio të vogël, ndërsa i dyshuari që shkaktoi aksidentin është identifikuar si Agim Dauti rreth 30-vjeçar, ngasës i një veture Mercedes 212.
Aksidenti ka ndodhur rreth orës 16:20, kur i dyshuari nuk ka mbajtur distancën e nevojshme dhe me pjesën e përparme të veturës ka goditur traktorin, duke e përplasur për mbrojtësen e rrugës dhe më pas e ka rrokullisur.
Nga goditja e fuqishme, Haxhimustafa ka pësuar lëndime të rënda trupore dhe fillimisht është dërguar në Spitalin Rajonal “Isa Grezda” në Gjakovë e më pas në QKUK, ku rreth orës 22:50 është konfirmuar vdekja e tij.
Me urdhër të Prokurorit të Shtetit, trupi i pajetë është dërguar për autopsi në IML Prishtinë, ndërsa i dyshuari është ndaluar për 48 orë.
