Sot Albin Kurti si kryeministër në detyrë dhe kryetar i Lëvizjes Vetëvendosje me kundërshtarët e tij politikë, kryetarin e Partisë Demokratike Memli Krasniqi dhe kryetarin e Aleancës për Ardhmërinë e Kosovës Ramush Haradinaj, përdorin shpesh gjuhë të ashpër ndaj njëri-tjetrit.
Por në mes të vitit 2001 në Prishtinë me protestë përmes një koncerti ishte kërkuar lirimi i Albin Kurtit, edhe nga kundërshtarët e tij politikë të sotëm.
Kurti, si i arrestuar politik, po mbahej në burg pas arrestimit më 1999 nga forcat serbe.
“Albinin nuk e kam njohur, kam fituar simpati për të. Unë kam qenë ushtar, ai një prej zëdhënësve tanë dhe ruaj simpati”, ishte shprehur Ramush Haradinaj.
E Memli Krasniqi pati thënë se Kurti ishte një prej të burgosurve më të famshëm politikë.
“Ka qenë koha e fundit që dikujt me i ra ndër mend me bë diçka për Albin Kurti, pasi që në njëfarë mënyrë njeriu u llogaritke dikur si një prej të burgosurve politikë më të famshëm që tash ka mbetur në harresë. Mua personalisht si anëtar i ‘Ritmit të Rrugës’ ndihem mirë që përmes këtij koncerti e jap kontributin tim”, ishte shprehur ai.
