Kushdo që kontrollon detet do të fitojë konfliktin e ardhshëm. Të paktën në Oqeanin Paqësor. Ky supozim kuptohet mirë nga gjeneralët e Pentagonit, të cilët po e ndjekin me shqetësim në rritje forcimin e marinës kineze, dhe veçanërisht të nëndetëseve të saj. Pekini, raporton Wall Street Journal në një analizë të thelluar mbi këtë temë, është në prag të bërjes një fuqi nëndetëse e klasit botëror me një flotë më të madhe dhe më të mirë dhe teknologji të reja. Kina po fiton kështu terren ndaj Shteteve të Bashkuara dhe aleatëve të saj, duke ndezur një garë armatimesh në thellësitë e Paqësorit.
Republika Popullore tani ka nëndetëse të heshtura dhe të shpejta, të afta të qëndrojnë nën ujë më gjatë dhe të mbajnë armë dhe sensorë më të përparuar. E gjithë kjo ndodh ndërsa autoritetet kineze kanë zgjeruar kufijtë e “oborrit të tyre” në Detin e Kinës Jugore dhe kanë demonstruar gatishmërinë e tyre për të rrethuar Tajvanin në pritje të një pushtimi të mundshëm të “provincës rebele”.
Uashingtoni dhe vendet e tjera perëndimore nuk rrinë duarkryq. SHBA-të mbajnë baza ushtarake në rajon dhe vitin e kaluar vendosën nëndetëset e tyre më të përparuara sulmuese të klasit Virginia në Paqësor. Ekspertët thonë se të gjitha fuqitë që aspirojnë të kenë një marinë në Indo-Paqësor po ndërtojnë ose blejnë nëndetëse. Sipas paktit të mbrojtjes “Aukus” të vitit 2021, Australia pritet të blejë deri në 5 nëndetëse me energji bërthamore nga Shtetet e Bashkuara dhe të bashkëpunojë me Mbretërinë e Bashkuar për ndërtimin e një njësie të re.
Pakti “Aukus”, megjithatë, po rishikohet nga administrata Trump, pjesërisht për shkak të vonesave në ndërtimin e nëndetëseve. SHBA-të po përpiqen të mbajnë ritmin me nivelet e prodhimit të Kinës.
Pekini tashmë ka kapacitetin më të madh në botë për ndërtimin e anijeve tregtare dhe flotën më të madhe detare. Gjigandi aziatik ka përmirësuar veçanërisht nëndetëset e tij me energji bërthamore, duke përfshirë “Tipin 095”, të cilat ekspertët e industrisë parashikojnë se do të jenë shumë të qeta, dhe ato me energji konvencionale. Në paradën e fundit ushtarake, trashëgimtari i Perandorisë Qiellore zbuloi, ndër të tjera, një dron nënujor që mund të funksionojë si nëndetëse.
Kur bëhet fjalë për nëndetëset, Shtetet e Bashkuara aktualisht kanë ende një avantazh teknologjik ndaj Kinës, por kjo mund të bëhet dytësore duke pasur parasysh kapacitetin e kufizuar të prodhimit të Amerikës. Dorëzimi i nëndetëses së parë me raketa balistike të klasit Columbia është planifikuar për vitin 2029, pasi ka akumuluar tashmë një vonesë dyvjeçare.
SHBA-të po punojnë gjithashtu në një klasë të re nëndetësesh ultra të përparuara, aktualisht të përcaktuara si SSN(X), ndërtimi i të cilave pritet të fillojë në vitin 2040. Duke i shtuar kësaj edhe vonesën e konsiderueshme të mirëmbajtjes për njësitë e ndryshme, pamja që rezulton për Amerikën është e zymtë.
Ndërkohë, gara me kohën në prodhimin e nëndetëseve po përfshin aleatët e Uashingtonit. Kërcënimet e vazhdueshme të Kinës kundër Tajvanit nuk po injorohen nga vende të tilla si Japonia, Koreja e Jugut, Filipinet, Australia, Singapori, ashtu si dhe Franca dhe Mbretëria e Bashkuar, të cilat po përgatiten të tërhiqen në një aleancë në kohë lufte kundër Kinës.
Jetësore në një skenar të tillë do të ishte aftësia e koalicionit perëndimor për të luftuar, për të mbrojtur korridoret e transportit detar dhe për të bllokuar aksesin e Republikës Popullore në burimet strategjike.
Arritja e këtyre objektivave dhe fati i Taipeit varen gjithashtu nga shpejtësia me të cilën kantieret detare të vendeve aleate prodhojnë nëndetëse të gatshme për t’iu kundërvënë fuqisë ushtarake të Kinës. /Përshtatur nga Il Giornale/
