Pas samitit të tensionuar në Alaskë, presidenti amerikan Donald Trump u nda nga Ukraina dhe aleatët kryesorë evropianë, duke miratuar një plan paqeje që favorizon kërkesat ruse për lëshim territoresh, në vend të armëpushimit urgjent që ishte propozuar më parë.
Sipas “New York Times”, Trump i ka thënë udhëheqësve evropianë se një marrëveshje gjithëpërfshirëse paqeje mund të arrihet nëse Ukraina pranon t’ia dorëzojë Rusisë edhe pjesë të papushtuara të rajonit të Donbasit. Në këmbim, Putini ka ofruar armëpushim dhe premtim për mos sulmim në vijat aktuale të betejës.
Kjo qasje është pritur ftohtë në Evropë, ku udhëheqësit kanë shprehur shqetësim për ndryshimet e qëndrimeve të Trumpit ndaj Ukrainës pas takimit me Putinin. Ata kanë nënvizuar rëndësinë e vazhdimit të presionit ekonomik ndaj Rusisë derisa të ndalet agresioni.
Trump nga ana e tij ka theksuar se përparësia është një marrëveshje paqeje e qëndrueshme dhe jo vetëm armëpushim, duke paralajmëruar se kjo do të sjellë fundin e luftës.
Ndërkohë, Rusia vazhdon kërkesat për të marrë pjesë të mëdha të territorit ukrainas, çarmatimin e Ukrainës dhe ndalimin e bashkimit me NATO-n.
