Një gjykatë në Korenë e Jugut ka urdhëruar arrestimin e Kim Keon Hee, bashkëshortes së ish-presidentit të shkarkuar Yoon Suk Yeol, duke e bërë atë ish-zonjën e parë në historinë e vendit që përfundon në pranga.
Vendimi i gjykatës së qarkut qendror të Seulit krijon një situatë të paprecedentë, pasi të dy anëtarët e një ish-çifti presidencial ndodhen njëkohësisht në paraburgim.
Yoon Suk Yeol u rikthye në qeli në korrik, ndërsa po hetohet për një tentativë të dështuar për të shpallur gjendjen e jashtëzakonshme në dhjetor të vitit të kaluar. Ndërkohë, Kim përballet me akuza të rënda, përfshirë manipulimin e aksioneve të kompanisë Deutsch Motors mes viteve 2009-2012, me fitime që kalojnë 800 milionë won (rreth 428 mijë paund).
Ajo akuzohet gjithashtu për marrjen e mbi 270 milionë won në financime politike të paligjshme përmes sondazheve falas, të cilat thuhet se i përdori për të ndikuar në përzgjedhjen e kandidatëve të partisë konservatore People Power gjatë zgjedhjeve të pjesshme të vitit 2022. Akuza e tretë lidhet me pranimin e dhuratave luksoze – përfshirë çanta Chanel dhe bizhuteri të shtrenjta – nga Kisha e Bashkimit, në këmbim të trajtimit të favorshëm të projekteve zhvillimore në Kamboxhia.
Gjykatësi Jeong Jae-wook argumentoi se vendimi për arrestim u mor për shkak të “frikës për shkatërrim të provave”. Kim ka mohuar të gjitha akuzat, duke u ankuar se “edhe çështje nga para martesës po nxirren në pah”.
Ish-zonja e parë do të mbahet në qendrën e paraburgimit Nambu në jugperëndim të Seulit, e ndarë nga burri i saj, i cili ndodhet në një tjetër institucion që prej korrikut. Kim Keon Hee ka qenë një figurë shumë e komentuar gjatë presidencës së Yoon, e përfshirë në skandale si ai i famshmi i “çantës Dior”, ndërsa kohët e fundit i janë revokuar edhe titujt akademikë për plagjiaturë.
