Deputetja e Partisë Demokratike të Kosovës (PDK), Blerta Deliu, ka reaguar menjëherë pas shpalljes së vendimit të Gjykatës Kushtetuese, që e shpall të pavlefshëm procesin e zgjedhjes së Kryetarit të Kuvendit të Kosovës përmes votimit të fshehtë.
Sipas Deliut, ky verdikt konfirmon se prej 1 majit e deri më sot, seancat e Kuvendit të udhëhequra nga Avni Dehari, si përfaqësues i Vetëvendosjes, janë zhvilluar në kundërshtim me Kushtetutën.
“Qeverisja e Albin Kurtit, përmes Avni Deharit, ka shkelur Kushtetutën në secilën seancë që nga 1 maji. Detyruan votim të fshehtë dhe na mohuan të drejtën për votë të hapur për Kryetar Kuvendi”, tha Deliu në një postim në Facebook.
