Pas tragjedisë që i goditi, familja kërkon përgjigje. Simona Cinà vdiq ndërsa ishte në një festë në pishinë në Bagheria, në provincën e Palermos. Ajo ishte 20 vjeç. Avokati i familjes, Gabriele Giambrone, kishte shprehur dyshimet fillestare. Edhe te familjarët e saj gjithashtu ka dyshime.
Karabinierët po hetojnë lidhur me festën dhe po shqyrtojnë elementë të shumtë: një video të xhiruar nga vetë Simona, gjendjen e vilës kur mbërritën oficerët, ftesën për festën që kishte qarkulluar ditët e mëparshme dhe gjurmët e gjakut të gjetura.
“Që kur Simona vdiq, askush nga të pranishmit në festë nuk na ka telefonuar. Askush. Përveç dy miqve të saj të dashur që madje na dërguan videon që tregonte se si ishte veshur. Nga 80 të tjerët, askush nuk na ka telefonuar. E pabesueshme”, thotë Roberta Cinà, motra binjake e Simona Cinà-s.
“Nuk duam të fajësojmë askënd, por e dimë që diçka nuk shkon, nuk e dimë çfarë”, tha vëllai i saj, Roberto.
“Historia nuk qëndron. Ne e njihnim Simonën; ajo nuk mund të ishte mbytur kurrë në pishinë. Ishte e pamundur që ajo të mos dinte si ta përballonte një situatë të tillë”, shton ai.
Në vijim, vëllai më i madh i 20-vjeçares, Gabriele Cinà shprehet se “ne pyesnim veten nëse kishte drogë në festën e diplomimit, por për momentin nuk e dimë. Gjithashtu menduam se dikush i kishte hedhur drogë në pije”.
E veshur me një fund xhins dhe një këmishë jeshile, me një gotë plastike në dorë, muzikë me volum të lartë, një valle në grup dhe shumë të qeshura. Këto janë momentet e fundit të Simona Cinà-s, të kapura në një nga videot e postuara nga miqtë që ishin në festën e diplomimit ku humbi jetën njëzetvjeçarja.
Në një video tjetër, vajza është në një dhomë me dy shoqe që këndojnë, kërcejnë dhe qeshin ndërsa një celular i regjistron ato.
“Çuditërisht, ka pak, ose më saktë shumë pak video të festës së diplomimit. Nuk ka imazhe të tortës, të festës, asgjë. Kush e di pse. E çuditshme, apo jo?”, thotë Gabriele Giambrone, avokat i familjes së Simona Cinà-s.
