Një fenomen i rrezikshëm natyror ka vënë në alarm banorët e fshatit Dëshiran, në Bashkinë e Belshit. Pranë disa banesave janë hapur gropa karstike me thellësi deri në 25 metra, duke vënë në rrezik të drejtpërdrejtë jetën e komunitetit lokal.
Banorët, të tronditur dhe të frikësuar, rrëfejnë se çdo natë dëgjojnë zhurma të forta që vijnë nga nëntoka. “Dheut i ka hyrë fundi,” thotë një banor, ndërsa tregon se si toka poshtë këmbëve po zhduket dita-ditës. Të shqetësuar për fatin e banesave të tyre dhe të fëmijëve, ata i bëjnë apel institucioneve të reagojnë përpara se të jetë vonë.
Ekspertët e gjeologjisë e kanë klasifikuar zonën e Dumresë, ku ndodhet edhe Dëshirani, si një nga territoret më të ndjeshme në Shqipëri. Me mbi 84 liqene natyrore, të krijuara nga shkrirja e shkëmbinjve të gëlqeres dhe gipsit, ky rajon është i ekspozuar ndaj fenomeneve karstike. Por pavarësisht kësaj, reagimi institucional ka qenë minimal.
Në një kohë kur reshjet dhe ndryshimet klimatike po e bëjnë edhe më të brishtë këtë territor, neglizhenca e autoriteteve ngre pikëpyetje të forta për sigurinë publike dhe përgjegjësinë shtetërore. A do të presim tragjedinë për të vepruar?
