Presidenti serb Aleksandar Vuçiq e pyeti sot presidentin turk Rexhep Tajip Erdogan se “çfarë do të ndodhte nëse Serbia do të armatoste juglindjen e Turqisë dhe territore të tjera që ky vend i pretendon”.
Kurdët jetojnë në Turqinë juglindore dhe prej dekadash kërkojnë krijimin e shtetit të tyre.
Vuçiq, duke folur për armatosjen turke të Kosovës, tha se Turqia është furnizuesi kryesor i FSK-së.
Ai tha se një vit më parë e kishte prezantuar Erdoganin me dokumentet përkatëse ndërkombëtare dhe rezolutat e OKB-së që, sipas tij, “po shkelen duke dërguar armë në Prishtinë.”
“Dhe e luta të mos e bënte këtë”, tha Vuçiq.
Ai shtoi se sjellja e Turqisë është thelbësore për stabilitetin e rajonit.
Turqia e ka furnizuar Kosovën me “dronë kamikazë” të tipit Skydagger të mërkurën.
Duke reaguar ndaj kësaj, Vuçiq tha të mërkurën mbrëma në rrjetin X se “Turqia ëndërron të rindërtojë Perandorinë Osmane”.
