Policia e Shtetit ka arrestuar në Tropojë autorin e dyshuar të vrasjes së të riut Egli Pashollari në Tiranë.
Sipas njoftimit zyrtar, në kuadër të operacionit të koduar “Distanca”, i finalizuar nga Policia dhe Prokuroria e Tiranë, u bë i mundur lokalizimi dhe ndalimi i shtetasit Gazment Bucpapa, 40 vjeç.
Ai dyshohet se më datë 20.02.2026 ka vrarë me thikë 32-vjeçarin Egli Pashollari, gjatë një konflikti në rrugë, në zonën e ish-parkut në Tiranë.
Sipas policisë, 40-vjeçari u mbajt në mbikëqyrje teksa fshihej në një banesë në vendlindjen e tij, në Tropojë, ku më pas u bë arrestimi i tij.
“Në kuadër të këtij operacioni, pasi u lokalizua dhe u mbajt në mbikëqyrje në banesën ku fshihej në vendlindjen e tij, në Tropojë, u bë ndalimi i shtetasit G. B., 40 vjeç, për veprat penale ‘Vrasja me dashje’ dhe ‘Prodhimi, mbajtja, blerja apo shitja pa leje e armëve të ftohta’”, njofton policia.
Materialet procedurale i janë referuar Prokurorisë së Tiranës për veprime të mëtejshme.
