Ka dy orë që ka nisur takimi i liderëve të partive politike, i thirrur nga kryeministri në detyrë, Albin Kurti.
Deri më tani, takimi ende nuk ka përfunduar dhe po zhvillohet me dyer të mbyllura.
Qëllimi kryesor i këtij takimi është gjetja e një zgjidhjeje për konstituimin e Kuvendit të Kosovës, pas aktgjykimit të Gjykatës Kushtetuese, e cila obligon partitë që brenda 30 ditësh të zgjedhin kryetarin dhe nënkryetarët e Kuvendit.
Në tryezën e thirrur nga Kurti po marrin pjesë përfaqësues të shumicës së partive politike, përfshirë kryetarin e PDK-së Memli Krasniqi dhe deputeten Vlora Çitaku, liderin e LDK-së Lumir Abdixhiku dhe shefen e grupit parlamentar Hykmete Bajrami, si dhe deputeten e AAK-së, Time Kadrijaj.
Në takim janë të pranishëm gjithashtu edhe kryetari i Nismës, Fatmir Limaj, kryetarja e Alternativës, Mimoza Kusari-Lila, përfaqësuesi i GUXO-s, Faton Peci, si dhe përfaqësues të komuniteteve jo-shumicë.
Nuk dihet ende nëse takimi do të sjellë ndonjë marrëveshje konkrete, ndërsa pritet që pas përfundimit të tij të ketë deklarime për media.
