Komandanti i forcave të armatosura të Ukrainës, gjenerali Oleksandr Syrskyi ka paralajmëruar sulme të reja nga Rusia.
Ai tha se pritet një ofensivë e re ruse në rajonin e Kharkivit, një zonë kyçe në verilindje të vendit, e cila ka qenë vazhdimisht në qendër të luftimeve që prej fillimit të pushtimit rus në vitin 2022.
Sipas Syrskyi, forcat ruse kanë intensifikuar përpjekjet gjatë kësaj vere, duke avancuar ngadalë në disa sektorë të vijës së frontit dhe duke kryer sulme të vazhdueshme me një numër të madh trupash. Gjenerali tha se Rusia po përpiqet të përfitojë nga epërsia numerike dhe teknologjike.
Një tjetër zonë e tensionuar mbetet rajoni verior i Sumyt, ku trupat ruse kanë ndërtuar një prani të kufizuar muajt e fundit.
Përmes një postimi në Telegram, Syrskyi njoftoi se ka qëndruar për dy ditë në rajonin e Kharkivit, ku ka zhvilluar takime me komandantët në terren, ka inspektuar pozicionet mbrojtëse dhe ka vlerësuar nevojat operative të ushtrisë.
“Rusët po përpiqen të avancojnë përmes forcës së numrit, por ne duhet të përgjigjemi me taktika efektive dhe përdorimin e teknologjive moderne për t’i ndalur”, theksoi ai.
