Në Gjykatën Themelore të Prishtinës ka nisur seanca e shqyrtimit fillestar ndaj Blerim Avdiut, i cili po akuzohet për kanosje ndaj ministrit në detyrë të Bujqësisë, Faton Peci.
Sipas aktakuzës së Prokurorisë, Avdiu dyshohet se më 2 mars 2025, përmes rrjetit social Facebook, i ka dërguar Pecit mesazhe kërcënuese, duke përdorur fjalor fyes dhe gjuhë kërcënuese.
“Kryekriminel, ti q** edhe ata të vdekurit, unë kam me të vra, jo tjetër kush… gjallë ti, gjallë unë, nuk kemi me jetu. Ta dish edhe vorrin e nanës. Mos harro, me 28 maj jam në kufi veç me ardh me të v** ty kam me ardh, dije mirë.”**”, thuhet në dosjen e Prokurorisë.
Këto fjalë, sipas Prokurorisë, përbëjnë kërcënim të drejtpërdrejtë për jetën dhe sigurinë e ministrit Peci, duke shfaqur qartë qëllimin e të pandehurit për të frikësuar viktimën.
Aktakuza e ngarkon Blerim Avdiun me veprën penale “kanosje”, e cila parashihet dhe ndëshkohet sipas Kodit Penal të Republikës së Kosovës.
