Ukraina njoftoi të premten se dronët e saj kanë goditur dy fabrika kyçe në rajonin e Moskës dhe atë të Tulës, duke shkaktuar shpërthime dhe zjarre të mëdha.
Sipas ushtrisë ukrainase, fabrika e aviacionit në Lukhovitsi, rreth 135 km në juglindje të Moskës, prodhonte avionë luftarakë MiG, ndërsa Byroja e Projektimit të Instrumenteve në Tulë ishte e specializuar në prodhimin e raketave kundërajrore dhe sistemeve raketë-armë.
“Forcat e mbrojtjes po vazhdojnë t’i marrin të gjitha masat për ta minuar potencialin ushtarak dhe ekonomik të pushtuesve rusë dhe për ta detyruar Rusinë ta ndalë agresionin e saj të armatosur kundër Ukrainës,” tha ushtria ukrainase në Telegram.
Nga ana tjetër, Ministria e Mbrojtjes së Rusisë raportoi se gjatë natës janë rrëzuar 155 dronë ukrainas, përfshirë 11 që synonin Moskën. Guvernatori i rajonit të Tulës, Dmitry Milyaev, konfirmoi vdekjen e një personi dhe plagosjen e një tjetri nga sulmi.
Luftimet midis Rusisë dhe Ukrainës vazhdojnë për gati tri vjet e gjysmë, duke përfshirë edhe sulme ajrore ndaj objektivave larg vijës së frontit.
