Deputetja e Lëvizjes Vetëvendosje, Arjeta Fejza, menjëherë pas balotazhit në mes të PDK-së dhe LDK-së në Mitrovicë, ka prezantuar një kuadro të re kinse të marrë nga LDK’ja.
“Arbnori është i lindur dhe i rritur në Mitrovicë, jurist i diplomuar dhe afarist i suksesshëm. Për dhjetë vite ai është angazhuar në LDK, duke mbajtur disa funksione, por, ka vendosur t’i bashkohet Lëvizjes për ta vazhduar angazhimin e tij politik në interes të vendit tonë”, ka shkruar Fejza në ‘Facebook’.
Lidhur me këtë shkrim ka reaguar kryetari i Forumit Rinor të LDK-së në Mitrovicë, Shpat Neziri, duke thënë se Arbnor Hamiti nuk ka qenë pjesë e strukturave të partisë që nga 2023-a.
“Deputete Fejza, promovimin që po i bëni Arbnor Hamitit, duke pretenduar se e keni marrë nga LDK-ja, duhet ta dini se ata që nga viti 2023 nuk kanë qenë në asnjë funksion të LDK-së, dhe edhe më herët ju kanë shërbyer në mënyrë tinëzare, ndërsa sot po shpërfaqen”, ka thënë ndër të tjera ai.
