Presidenti i SHBA-së, Donald Trump, po bën përpjekje intensive për të bindur Izraelin që të pranojë një armëpushim të ri në Gaza, tani që përplasja me Iranin është zbehur.
Duke folur nga samiti i NATO-s në Hagë, Trump deklaroi: “Ka përparim. Mendoj se sulmi që nisëm ndaj Iranit do të çojë në lajme shumë të mira.”
Sipas Newsweek, Trump e sheh këtë moment si një mundësi për të përforcuar imazhin e tij si ndërmjetësues global dhe për të nxitur një marrëveshje paqeje mes Izraelit dhe Hamasit.
Propozimi i fundit për armëpushim parashikon lirimin e 10 pengjeve izraelite të gjalla dhe kthimin e trupave të 18 të tjerëve, të ndarë në dy faza gjatë shtatë ditëve të para të marrëveshjes.
Në këmbim, Izraeli do të lirojë 1,236 të burgosur palestinezë dhe do të dorëzojë 180 trupa të ndaluar. Po ashtu, të dy palët do të ofrojnë informacion të azhurnuar për të ndaluarit deri në ditën e dhjetë të marrëveshjes.
Propozimi përfshin gjithashtu një pezullim të operacioneve ushtarake izraelite dhe të mbikëqyrjes ajrore për 10 deri në 12 orë çdo ditë gjatë periudhës së shkëmbimit të pengjeve dhe të burgosurve. Trupat izraelite do të tërhiqeshin në korridorin Netzarim dhe në veri të Gazës, ndërsa ndihma humanitare do të rifillonte.
Gjatë armëpushimit, të dy palët do të zhvillonin negociata për një zgjidhje afatgjatë, me mundësi për zgjatje deri në 60 ditë.
Megjithëse zyrtarët amerikanë dhe izraelitë thonë se Hamasi ka refuzuar marrëveshjen, grupi militant pretendon se e ka pranuar, por kërkon garanci që Izraeli nuk do të rifillojë luftën pas përfundimit të armëpushimit.
Presioni në Izrael për një marrëveshje po rritet. Protesta janë mbajtur jashtë shtëpive të zyrtarëve të lartë për të kërkuar veprim.
Ndërkohë, kryeministri Benjamin Netanyahu pritet të diskutojë marrëveshjen për shkëmbim pengjesh dhe normalizim me Sirinë gjatë vizitës së tij të ardhshme në Uashington.
