Vladimir Putin po përpiqet ta joshë Donald Trumpin me një skemë prej 6 miliardë paund për të ndërtuar një tunel që lidh Rusinë dhe Amerikën.
Propozimi është shfaqur ndërsa shefi i Kremlinit përpiqet me dëshpërim ta pengojë Trumpin të furnizojë Ukrainën me raketa Tomahawk, që janë me rreze të gjatë veprimi dhe mund të ndryshojnë ” lojën”.
Projekti për një “tunel Putin-Trump” që mban emrat e të dy presidentëve u paraqit nga Kirill Dmitriev, kreu i Fondit Rus të Investimeve Direkte [RDIF] ose fondit sovran të pasurisë, dhe një bashkëpunëtor i ngushtë familjar i vajzës gjithnjë e më të fuqishme të diktatorit rus, Katerina Tikhonova, 39 vjeç.
Kompania “The Boring Company” e Elon Musk do të merrte pjesë në gërmimin e tunelit, sipas Dmitriev, i cili është pjesë e delegacionit rus që dyshohet se po punon për të ndërmjetësuar përfundimin e konfliktit.
“Imagjinoni të lidhni SHBA-në dhe Rusinë, Amerikën dhe Afro-Eurazinë, me tunelin Putin-Trump, një rrugë prej 70 milje që simbolizon unitetin”, deklaroi Dmitriev, duke shpërfillur luftën e Kremlinit e cila ka shkatërruar unitetin.
Pika më e afërt midis dy kombeve shtrihet përtej Ngushticës së ashpër të Beringut. Në pjesën e saj më të ngushtë, vetëm 82 km ndan Kepin e Princit të Uellsit në Alaska nga Kepi Dezhnev, në territorin më të largët të Rusisë, Chukotka.
Megjithatë, ekziston një humnerë e madhe midis Alaskës, relativisht të begatë, dhe territorit të varfër të gjuetisë së balenave të Çukotkës.
“Duke përdorur teknologji moderne nga The Boring Company, ky mund të bëhet tuneli Putin-Trump që lidh Euroazinë dhe Amerikën, [dhe i ndërtuar] për më pak se 8 miliardë dollarë”, deklaroi Dmitriev.
Me sa duket, Rusia po mbështetet në projektin ambicioz për të zgjuar interesin e Trump, ndërsa Putin përpiqet të parandalojë që raketat Tomahawk me rreze të gjatë veprimi të SHBA-së të arrijnë në Ukrainë.
“RDIF ka investuar dhe ndërtuar tashmë urën e parë hekurudhore midis Rusisë dhe Kinës”, deklaroi ai, duke shtuar “është koha për të bërë më shumë dhe për të lidhur kontinentet për herë të parë në historinë e njerëzimit. Është koha për të lidhur Rusinë dhe Shtetet e Bashkuara”.
Ai pohoi se “kjo jo vetëm që do të ndryshonte tregtinë globale, por do të ndryshonte gjithçka për mirë.”
Në teori, një sipërmarrje e tillë mund ta zgjeronte Hekurudhën Trans-Siberiane me famë botërore deri në Amerikën e Veriut. Në fakt, këto plane nuk kanë dalë së fundmi; ekspansionisti amerikan William Gilpin dikur propozoi një hekurudhë globale që përfshinte një kalim për në Bering.
Joseph Strauss, i cili më vonë u bë kryeinxhinier i Urës Golden Gate, hartoi një projekt të urës hekurudhore dhe ia paraqiti atë Rusisë Perandorake.
Cari i fundit i Rusisë, Nikolla II, e kishte vënë syrin në këtë projekt të madh përpara përmbysjes së tij në vitin 1917 dhe ekzekutimit të mëvonshëm nga bolshevikët vitin pasardhës.
Ideja u ringjall nga SHBA-të në vitet 1960, gjatë Luftës së Ftohtë, dhe ishte parashikuar si Ura e Paqes Kennedy-Hrushov, por dështoi për shkak të rivalitetit të superfuqisë së SHBA-së me BRSS-në.
Dy ishuj përgjatë rrugës së propozuar, Ishulli Ratmanov i Rusisë dhe Ishulli Krusenstern i Amerikës, janë vetëm dy milje e gjysmë larg njëri-tjetrit.
Nëse të dy ishujt shërbejnë si pika urash, ndërtimi i tunelit mund të kryhet në disa faza.
Dmitriev vlerësoi se tuneli mund të përfundonte brenda tetë vjetësh, kohë në të cilën Trump do të ishte 87 vjeç dhe Putin 81.
