Volodymyr Zelensky dhe Donald Trump kanë rënë dakord të punojnë së bashku për të “forcuar” mbrojtjen ajrore të Ukrainës, pasi Kievi u bombardua me një shifër rekord dronësh dhe raketash.
Vladimir Putin urdhëroi forcat e tij të sulmonin kryeqytetin e Ukrainës pas një telefonate me zotin Trump të enjten në mbrëmje, të cilën presidenti amerikan e përshkroi si “zhgënjyese”.
Zelensky tha se foli me Trump të premten dhe të dy ranë dakord të “forcojnë mbrojtjen e qiejve tanë”. Detajet e marrëveshjes nuk janë ende të qarta, por presidenti ukrainas sugjeroi se ata diskutuan prodhimin e përbashkët të sistemeve kryesore të mbrojtjes ajrore.
Administrata e zotit Trump pezulloi disa dërgesa armësh në Ukrainë më herët këtë javë, duke shkaktuar paralajmërime nga Kievi se ky veprim do të dobësonte aftësinë e tij për t’u mbrojtur kundër sulmeve ajrore dhe përparimeve në fushëbetejë të Rusisë.
Kancelari i Gjermanisë foli gjithashtu me zotin Trump të enjten. Friedrich Merz tha se ai diskutoi blerjen e sistemeve të mbrojtjes ajrore Patriot të prodhuara në SHBA për të kapërcyer hendekun.
Por Putin nisi një sulm rekord ndaj Kievit, duke lëshuar 550 dronë dhe raketa drejt Ukrainës, disa orë pasi Donald Trump u ankua për telefonatën e tyre “zhgënjyese”.
Kievi ishte fokusi kryesor i bombardimeve të Rusisë gjatë natës, të cilat lanë një të vdekur dhe 23 të plagosur në kryeqytet, sipas Tymur Tkachenko, kreut të administratës ushtarake të Kievit.
“Natë absolutisht e tmerrshme dhe pa gjumë në Kiev. Një nga më të këqijat deri më tani. Qindra dronë dhe raketa balistike ruse ranë me shpejtësi mbi kryeqytetin ukrainas. Menjëherë pasi Putin foli me Presidentin Trump”, tha Andrii Sybiha, ministri i jashtëm i Ukrainës.
Volodymyr Zelensky, presidenti ukrainas, tha se Rusia nuk do ta “ndryshojë sjelljen e saj të trashë dhe shkatërruese” pa rritur presionin, veçanërisht nga SHBA-ja.
Sulmi, i cili theu një rekord të vendosur vetëm fundjavën e kaluar, erdhi disa orë pasi zoti Trump foli me Putinin, një telefonatë që presidenti amerikan e përshkroi si “zhgënjyese”.
“Jam shumë i zhgënjyer nga biseda që pata sot me Presidentin Putin, sepse nuk mendoj se ai është atje”, u tha ai gazetarëve.
“Po them vetëm se nuk mendoj se ai po kërkon të ndalet, dhe kjo është shumë keq”, shtoi Trump.
