Presidenti ukrainas Volodymyr Zelensky ka mbërritur në Uashington, ku pritet të takohet me Presidentin amerikan Donald Trump dhe udhëheqës evropianë brenda rreth 12 orësh.
Takimi zhvillohet vetëm dy ditë pas bisedimeve mes Trump dhe Presidentit rus Vladimir Putin në Alaska – një takim që ka shkaktuar debat të gjerë politik.
Sipas raportimeve të CNN, Trump është i vendosur të shtojë presionin mbi Ukrainën për të pranuar disa nga kushtet kyçe të propozuara nga Rusia për përfundimin e luftës. Ai i ka bërë jehonë disa pikave të diskutimit të Putinit, përfshirë kërkesat që Ukraina: të heqë dorë nga Krimea, e aneksuar nga Rusia në vitin 2014 dhe të pranojë të mos anëtarësohet kurrë në NATO.
Trump e ka bërë të qartë këtë qasje që mbrëmjen e së dielës, duke dhënë sinjale se do t’i përcjellë këtë mesazh drejtpërdrejt Presidentit Zelensky në takimin në Shtëpinë e Bardhë.
Nga ana tjetër, Shtëpia e Bardhë ka sinjalizuar një përpjekje për një marrëveshje paqeje, me të dërguarin amerikan Steve Witkoff që i tha CNN se:
“Putin ka rënë dakord të lejojë garanci sigurie nga SHBA-ja për Ukrainën dhe ka bërë lëshime për ‘shkëmbimet e tokave’.”
Megjithatë, Presidenti ukrainas ka qenë i prerë për sa i përket vijave të kuqe të vendit të tij.
“Kushtetuta e Ukrainës e bën të pamundur heqjen dorë nga territori ose tregtimin e tokës”,
– tha Zelensky të dielën, duke përforcuar qëndrimin e njohur të Kievit.
Ndërkohë që diplomacia intensifikohet, mbeten shumë pikëpyetje mbi mundësinë e një marrëveshjeje që do të ishte e pranueshme si për Ukrainën, ashtu edhe për aleatët e saj perëndimorë.
