Takimi midis Donald Trump dhe Vladimir Putin do të zhvillohet më 15 gusht në Alaska. Lajmin e konfirmoi vetë kreu i Shtëpisë së Bardhë në platformën e tij, Truth.
Por nga ana tjetër, Kremlini pret që, pas Alaskës, takimi i ardhshëm midis presidentëve rusë dhe amerikanë, Vladimir Putin dhe Donald Trump, të zhvillohet në tokën ruse.
Interfax citon këshilltarin e liderit rus, Yuri Ushakov, i cili ndërsa komentoi zgjedhjen e Alaskës si vend për samitin e krerëve të shteteve të Rusisë dhe Shteteve të Bashkuara më 15 gusht, u shpreh:
“Duke parë përpara, duhet të synojmë të sigurohemi që takimi i ardhshëm midis presidentëve të zhvillohet në tokën ruse. Ftesa përkatëse i është bërë tashmë presidentit të SHBA-së”, deklaroi zëdhënësi i Kremlinit.
Lidhur me zgjedhjen e Alaskës si vend për takimin e parë, Ushakov tha se “Rusia dhe Shtetet e Bashkuara janë fqinjë. Dhe duket plotësisht logjike që delegacioni ynë thjesht të kalojë Ngushticën e Beringut dhe që një samit kaq i rëndësishëm dhe i shumëpritur i udhëheqësve të dy vendeve të mbahet në Alaska”.
Ndërkohë Presidenti i Shteteve te Bashkuara të Amerikës, Donald Trump është i hapur për të mbajtur një samit trepalësh në Alaska me Presidentin rus Vladimir Putin dhe Presidentin ukrainas Volodymyr Zelensky, tha një zyrtar i Shtëpisë së Bardhë këtë fundjavë.
Megjithatë, kabineti i presidentit amerikan aktualisht po planifikon një takim dypalësh me Putinin me kërkesën e tij, shtoi zyrtari.
Nga ana tjetër, zyrtarët rusë dhe ukrainas nuk mund të kontaktoheshin menjëherë për komente mbi perspektivat e një takimi trepalësh.
