Brenda banesës së zhytur në errësirë, Robert O’Neill lëvizte duke parë hapësirat vetëm përmes pajisjes së shikimit të natës.
Ai ishte një nga anëtarët elitë të Seal Team 6, i përzgjedhur për të lokalizuar dhe eliminuar sauditin Osama Bin Laden, të cilin CIA kishte arritur ta identifikonte.
Lideri i Al Kaedës, i konsideruar përgjegjësi kryesor për sulmet terroriste të 11 shtatorit, fshihej në një kompleks të fortifikuar në periferi të Abbottabadit në Pakistan.
Pas muajsh hetimesh dhe ndjekjesh të kujdesshme të individëve të caktuar, dhe me rol kyç të një analisteje këmbëngulëse, CIA arriti në përfundimin se në atë banesë ndodhej terroristi më i kërkuar në botë.
Bin Laden
Më pas ndërhyri një njësi “e padukshme” e forcave speciale SEAL, ekzistenca e së cilës ishte e njohur për shumë pak persona deri në natën e së hënës, 2 maj 2011.
Forcat speciale u ngritën nga një bazë në Afganistan me tre helikopterë stealth, të padukshëm për radarët, pasi presidenti Barack Obama dha miratimin për operacionin “Shtiza e Poseidonit”. Me uljen pranë kompleksit, nisi faza vendimtare.
Ekzekutimi
Robert O’Neill ishte ndër të parët që u ngjit në shkallë së bashku me komandot e tjerë për të gjetur Bin Ladenin në një nga dhomat e shumta. Kur u thye një derë, ai kontrolloi hapësirën me pajisjen e natës dhe dalloi një figurë të njohur.
“Pashë Bin Ladenin. Dukej i tensionuar dhe ishte më i gjatë nga sa prisja. E qëllova dy herë në ballë. Ra në dysheme përpara shtratit dhe qëllova edhe një herë”, ka treguar ai më vonë.
Robert O’Neill
Pas goditjeve, lideri i Al Kaedës mbeti i pajetë në vend. Rrëfimi i plotë i operacionit u bë publik vite më pas.
Atë natë, O’Neill fitoi nofkën “The Shooter” (Ekzekutuesi), megjithëse edhe anëtarë të tjerë të njësisë kanë pretenduar të njëjtin rol. Vetë ai ka deklaruar se thjesht kreu detyrën e tij.
Dy vite pas operacionit, në një intervistë për revistën Esquire, ai tha: “U pyeta nëse ajo që bëra ishte gjëja më e mirë apo më e keqe e jetës sime”.
Obama duke ndjekur operacionin
Fillimisht, identitetet e pjesëmarrësve në operacion duhej të mbeteshin sekret, por interesi i madh mediatik bëri që disa prej tyre të dalin në publik. Një tjetër komando, Matt Bissonnette, deklaroi se ishte ai që e vrau Bin Ladenin dhe publikoi një libër, duke shkaktuar reagime në radhët e ushtrisë.
O’Neill e mbajti të fshehtë identitetin e tij për tre vite, deri në vitin 2014, kur e bëri publik në një dokumentar të Fox.
Jeta pas operacionit
Para se të fliste publikisht, ai kishte dhënë një intervistë anonime për gazetarin Phil Bronstein në Esquire. Për këtë intervistë u zhvilluan dhjetëra takime derisa O’Neill pranoi të rrëfehej.
Ai foli për pasiguritë pas largimit nga forcat speciale, për pensionin e ulët dhe për jetën personale, përfshirë ndarjen nga bashkëshortja dhe pasigurinë për të ardhmen jashtë ushtrisë.
Banesa ku fshihej Bin Laden
Deri në natën e operacionit, ai kishte marrë pjesë në më shumë se dhjetë misione speciale dhe kishte vrarë mbi 30 persona, sipas rrëfimit të tij.
Pas kthimit nga misioni, ai i dhuroi analistes së CIA-s që kishte kontribuar në zbulimin e vendndodhjes së Bin Ladenit karikatorin e armës së tij, nga i cili mungonin tre plumbat e përdorur gjatë operacionit.
Njësia elitare që kreu operacionin
Filmi “Zero Dark Thirty”, që trajton këtë operacion, u konsiderua një nga paraqitjet më të afërta me realitetin. Kur një i afërm e pyeti nëse e kishte parë më parë filmin, përgjigjja e tij ishte e shkurtër: “Kam parë origjinalin”.
