Hetimet për aksidentin tragjik të avionit të Air India, ku humbën jetën 260 persona në qershor, kanë zbuluar një detaj shqetësues lidhur me shkakun e rrëzimit.
Pak sekonda pas ngritjes, dy çelësat e kontrollit të karburantit në Boeing 787 Dreamliner u çaktivizuan papritur, duke shkaktuar ndërprerje totale të furnizimit me karburant dhe energji në motorë.
Ky veprim është i pazakontë dhe zakonisht ndodh vetëm pas uljes së avionit. Regjistrimet në kabinë tregojnë se pilotët ishin të konfuzuar për shkakun e ndërprerjes, ndërsa çelësat u kthyen në pozicionin normal gjatë fluturimit, duke shkaktuar një rifillim të pjesshëm të motorëve, por shumë vonë për të parandaluar katastrofën.
Avioni arriti të ngjitej vetëm 625 metra në ajër në mot të kthjellët, por humbi kontaktin me radarët pas 50 sekondash dhe u rrëzua në një zonë të populluar të qytetit Ahmedabad, duke shënuar një nga aksidentet më misterioze të aviacionit në Indi.
Raporti paraprak i hetimit, i udhëhequr nga autoritetet indiane dhe ekspertë ndërkombëtarë nga Boeing, General Electric, dhe rregullatorë nga SHBA-ja dhe Mbretëria e Bashkuar, ka ngritur pyetje mbi funksionimin e çelësave të karburantit. Këta çelësa janë të dizajnuar për të parandaluar aktivizimin aksidental dhe duhet të tërhiqen lart për t’u çaktivizuar, një veçori sigurie që përdoret që nga vitet ’50.
