Miliona njerëz me kancer të gjirit mund ta shmangin në mënyrë të sigurt kimioterapinë, pasi shkencëtarët kanë zhvilluar një test ADN-je që mund të dallojë pacientët që ka të ngjarë të përfitojnë nga ky trajtim nga ata që nuk përfitojnë, sipas rezultateve të një studimi klinik.
Studimi ndërkombëtar zbuloi se më shumë se dy të tretave të pjesëmarrësve mund t’u kursehen efektet anësore të kimioterapisë dhe të trajtohen vetëm me terapi hormonale, shkroi BBC.
Kimioterapia mund të shkaktojë lodhje, të përziera, rënie të flokëve, dobësim të sistemit imunitar dhe probleme me fertilitetin.
Studimi, i udhëhequr nga University College London (UCL), përfshiu më shumë se 4,000 pacientë të sapodiagnostikuar, mbi moshën 40 vjeç, në Britani, Norvegji, Suedi, Australi, Zelandë të Re dhe Tajlandë.
Shkencëtarët përdorën një test gjenetik të quajtur Prosigna për të matur aktivitetin e 50 gjeneve që lidhen me zhvillimin e kancerit të gjirit dhe për të llogaritur rrezikun e rikthimit të sëmundjes te secili pacient.
Pacientët që morën një rezultat të ulët – rreth dy të tretat e grupit – nuk iu nënshtruan kimioterapisë. Shkalla e mbijetesës pas pesë vjetësh në këtë grup ishte 93.7%, krahasuar me 94.9% te pacientët që kishin marrë kimioterapi si pjesë të trajtimit të tyre.
Trajtimi kryesor për kancerin e gjirit zakonisht është ndërhyrja kirurgjikale për heqjen e tumoreve. Kimioterapia shpesh rekomandohet më pas për të ulur rrezikun e rikthimit të sëmundjes.
Ajo ofrohet gjithashtu rregullisht për personat me kancer të gjirit në fazë të hershme që është përhapur në nyjet limfatike pranë zonës së prekur.
Sipas UCL-së, mjekët janë të shqetësuar se ky trajtim sjell pak përfitim për pacientët me llojin më të zakonshëm të kancerit të gjirit.
Universiteti tha se, si rezultat i këtij studimi, më shumë se 5,000 pacientë të Shërbimit Kombëtar të Shëndetit (NHS) çdo vit mund ta shmangin kimioterapinë.
Karen Bonham, nga Uellsi, mori pjesë në studim dhe tha se rezultatet janë një “lehtësim i jashtëzakonshëm”.
64-vjeçarja e shmangu kimioterapinë falë testit Prosigna dhe në vend të saj ka marrë tetë vjet radioterapi dhe terapi hormonale.
“Diagnoza dhe trajtimi i kancerit mund të jenë tronditës”, theksoi ajo.
Gjetjet e studimit do të prezantohen të shtunën në konferencën më të madhe botërore për kancerin, takimin vjetor të “American Society of Clinical Oncology”, që mbahet në Chicago.
Ende nuk dihet nëse këto rezultate vlejnë edhe për personat nën moshën 40 vjeç. Sipas UCL-së, përgjigjja për këtë pyetje pritet të vijë vetëm pas disa vitesh të tjera studimi.
