Një ngjarje e pazakontë dhe emocionuese ka ndodhur në një qytet amerikan, ku një “shi dollarësh” u bë realitet për dhjetëra qytetarë.
Ngjarja ishte dëshira e fundit e një pronari lavazhi makinash, i cili kishte ndërruar jetë së fundmi dhe kishte lënë me testament që pasuria e tij të shpërndahej në mënyrë simbolike përmes një “dhurate nga qielli”.
Rreth mesditës, një rrugë u mbyll përkohësisht, ndërsa një helikopter fluturoi mbi qytet dhe filloi të hidhte kartëmonedha të vërteta dollarësh nga lart.
Turma qytetarësh u mblodhën në vendin e ngjarjes, por pavarësisht entuziazmit, dëshmitarët thonë se gjithçka kaloi me qetësi, pa përleshje apo rrëmujë.
“Ishte si në film! Njerëzit ishin të buzëqeshur dhe e morën me sportivitet – askush nuk u shty apo u grind,” tha një qytetar për mediat lokale.
Brenda pak minutash, dollarët u mblodhën dhe rruga u rihap. Kjo ngjarje mbetet një nga mënyrat më origjinale dhe bujare për të kujtuar një njeri që, edhe pas vdekjes, zgjodhi të sjellë buzëqeshje.
