Raportuesi i Parlamentit Evropian për Kosovën, Riho Terras refuzoi të flasë për qëndrimin e tij mbi dialogun me Serbinë dhe çështje të tjera në vizitën e tij të parë në vend për misionin treditor për mbledhjen e fakteve.
Ai tregoi se është takuar me kryeministrin Albin Kurti dhe presidenten Vjosa Osmani, si dhe do të zhvillojë takime edhe me liderët e partive opozitare.
“Më jepni mundësinë që të takohem me të gjitha palët dhe me të gjithë njerëzit që t’i marrë pikëpamjet e tyre”, tha ai pasi u pyet për dialogun mes Kosovës dhe Serbisë.
Terras tregoi se do të shkojë edhe në pjesën veriore të vendit ku do t’i zhvillojë disa takime, e po ashtu do ta vizitojë edhe kanalin e Ibër-Lepencit ku ndodhi sulmi në fund të nëntorit.
Ai u shpreh i sigurt se autoritetet e Kosovës do ta zbulojnë se kush qëndron pas këtij sulmi.Për sulmin e 24 shtatorit 2023 në Banjskë të Zveçanit, ai tha se “të gjithë kriminelët duhet të sillen përpara drejtësisë”.
