Një ngjarje e rëndë ka ndodhur mbrëmë në fshatin Tërnovë të Skenderajt, ku një konflikt banal mes familjarëve ka përfunduar në tentim vrasjeje.
Burimet bëjnë me dije se rreth orës 19:30, një 61-vjeçar, S.K, është therur me thikë nga nipi i tij, Sh.K., rreth 23-vjeçar.
Sipas dëshmitarëve, gjithçka nisi kur viktima i kërkoi nipit që të ulte muzikën e lëshuar me zë të lartë nga vetura e tij. Pas debatit, i riu ishte larguar në shtëpi dhe dyshohet se mori një thikë, me të cilën u kthye në oborrin e axhës dhe e goditi disa herë në pjesë të ndryshme të trupit.
Viktima fillimisht ka marrë trajtim në QKMF Istog dhe më pas është dërguar në Spitalin Rajonal të Pejës. Ndërkohë, arma e përdorur në sulm nuk është gjetur ende.
Policia ka arrestuar të dyshuarin, i cili pas intervistimit është ndaluar për 48 orë me urdhër të Prokurorit, ndërsa rasti është iniciuar si “Vrasje në tentativë”.
Hetimet për rastin po vazhdojnë.
