Disa orë më parë në Pejë ka ndodhur një incident i rëndë që po trajtohet si tentim vrasje. Si i dyshuar për këtë rast tashmë është identifikuar 21-vjeçari Arb N. Shala, ndërkaq i dëmtuari, emër i njohur për redaksinë, po merr trajtim në Spitalin Regjional në Pejë.
Burimet tona konfirmojnë se së shpejti pritet dorëzimi vullnetar në polici i 21-vjeçarit Arb Shala, i dyshuar për këtë rast. Madje, policia tashmë janë vënë në dijeni dhe janë kontaktuar nga prindi i 21 vjeçarit .
Ngjarja dyshohet se ndodhi pas një ngatërrese të çastit mes të dyshuarit dhe të dëmtuarit, të cilët njiheshin edhe më parë. Sipas informatave, para se të shkrepte arma, i dëmtuari e kishte goditur me grusht Shalën dhe më pas e kishte sulmuar edhe me një karrige.
Në tentim për të ndalur sulmin, i riu dyshohet se ka nxjerrë armën dhe ka shtënë drejt pjesës së poshtme të trupit të viktimës, me qëllim që ta zbrapste.
Fatmirësisht, burimet konfirmojnë se i dëmtuari ndodhet jashtë rrezikut për jetë. Ndërkohë, familja e 21-vjeçarit dhe vetë ai kanë shprehur keqardhje të thellë për këtë incident, duke e konsideruar një ngjarje të paqëllimshme.
