Kandidatja për deputete e LDK-së, Hykmete Bajrami, ka reaguar për herë të parë pas daljes së rezultateve preliminare të zgjedhjeve të 7 qershorit.
Mes tjerash, në reagimin e saj ku thotë se qytetarët ndëshkuan partinë e Kurtit, ajo shprehet se ata i dhanë një mesazh edhe opozitës.
Një fjali që bie në sy është edhe pjesa kur thotë se tema qendrore u bë “kush ku do të ulet”, duke aluduar kështu edhe tek ambicia e Vjosa Osmanit që me çdo kusht ta fitojë karrigen e presidentes.
“Secili e ka kuptuar se tri palë zgjedhje u mbajtën jo për shkak të mospajtimeve: nëse duhet të prodhojmë apo të importojmë energji, jo sepse nuk u pajtuam për programe zhvillimore, por sepse tema qendrore u bë: kush ku do të ulet”, shkroi ajo duke potencuar se, përfundimisht, është koha të mendojmë përtej karrigeve.
Rrjedhimisht, Bajrami ka deklaruar se rezultati i këtyre zgjedhjeve është thirrje për reflektim sepse, nëse sipas saj “duam të jemi të sinqertë me veten, qartazi diku ia kemi huqur”.
