Pijet alkoolike, edhe në sasi të vogla, mund të rrisin rrezikun e demencës më vonë në jetë, sipas një studimi të ri që sfidon gjetjet e mëparshme, raporton CNN.
Disa hulumtime të mëparshme sugjeronin se pirja e lehtë, më pak se shtatë gota në javë, mund të ketë efekt mbrojtës për trurin, krahasuar me moskonsumimin e alkoolit. Por autorët e studimit të ri theksuan se ato analiza shpesh nuk dallonin mes ish-alkoolistëve dhe atyre që kurrë nuk kishin konsumuar, çka mund të ketë shtrembëruar rezultatet.
Studimi i fundit, i botuar në revistën BMJ Evidence-Based Medicine, përdori metodë të avancuar gjenetike për të analizuar efektet e alkoolit në tru.
“Analizat gjenetike kanë treguar se edhe sasitë më të vogla të alkoolit mund të rrisin rrezikun e demencës. Ky është studimi më i madh në këtë temë, dhe kombinimi i analizave vëzhguese me ato gjenetike ishte i rëndësishëm”, tha Anya Topiwala, hulumtuese në Departamentin e Psikiatrisë në Universitetin e Oksfordit.
Metoda e përdorur, e quajtur randomizim Mendelian, shmang ndikimin e faktorëve të tjerë që mund të prishin rezultatet dhe vlerëson efektin e akumuluar të alkoolit gjatë gjithë jetës, jo vetëm në moshë të mesme apo të vonë.
“Ky është një studim kompleks që ofron disa, por jo prova përfundimtare, se alkooli dëmton trurin pavarësisht sasisë së konsumuar”, tha neurologu Richard Isaacson, drejtor i studimeve në Institutin e Sëmundjeve Neurodegjenerative në Florida, i cili nuk ishte pjesë e studimit.
Ai shtoi se personave me variantin gjenetik APOE4, faktori më i zakonshëm që rrit rrezikun e Alzheimerit, u rekomandohet të mos konsumojnë aspak alkool.
“Për personat me rrezik më të ulët gjenetik, varet edhe ‘kur’ dhe ‘si’ pinë. Dy gota para gjumit, me stomak bosh, disa net radhazi, do të kenë efekt më të dëmshëm për shëndetin e trurit sesa një gotë disa herë në javë gjatë një darke të hershme”, tha ai.
Studimi analizoi të dhënat e UK Biobank me rreth 560 mijë pjesëmarrës dhe të Million Veteran Program në SHBA. Në pjesën vëzhguese, njerëzit që konsumonin pak alkool (më pak se 7 gota në javë) kishin rrezik më të ulët nga demenca sesa ata që pinin shumë (më shumë se 40 gota në javë).
“Megjithatë, ata që nuk pinë dhe ata që deklaruan se kurrë nuk kishin pirë, kishin rrezik të ngjashëm me alkoolistët e rëndë”, tha Tara Spires-Jones, profesoreshë në Universitetin e Edinburgut.
Kur u krahasuan shënuesit gjenetikë të lidhur me alkoolin tek 2.4 milionë njerëz, rezultatet ishin më të qarta: sa më e lartë prirja gjenetike për konsum, aq më i madh rreziku për demencë.
“Ka rritje prej 15% të rrezikut për demencë te njerëzit që pinë 3 gota në javë, krahasuar me ata që pinë vetëm 1 gotë në javë”, tha Topiwala.
Rritja e dyfishtë e rrezikut gjenetik për varësi nga alkooli u shoqërua me një rritje prej 16% të rrezikut për demencë.
“Edhe pse asnjë pjesë e studimit nuk mund të provojë përfundimisht se alkooli shkakton demencë, rezultatet shtojnë një sasi të madhe provash që e lidhin konsumimin e alkoolit me rrezikun e rritur. Për më tepër, hulumtimet bazë në neuroshkencë kanë treguar se alkooli është drejtpërdrejt toksik për neuronet e trurit”, tha Spires-Jones.
