Mehmet Prishtina, i cili dyshohet se përvetësoi 36 milionë euro toka të shtetit në Prishtinë dhe Graçanicë, është dënuar me 10 vjet burgim për rastin “Toka 2”.
Biznesmeni, i cili akuzohet edhe për prezantim të rrejshëm si stërnip i heroit Hasan Prishtina, u shpall fajtor për krim të organizuar dhe u dënua me 10 vjet burgim e 100 mijë euro gjobë të premten.
Aktgjykimi është shpallur nga Gjykata Themelore në Prishtinë, Departamenti Special.
Gjykata i ka shpallur fajtor dhe i ka dënuar edhe të bashkëakuzuarit e tjerë në këtë rast: Dukagjin Emërllahun dhe Nexharije Hoti me nga tetë vjet burgim, ndërsa Avni Maxhunin me 6 vjet burgim. Të akuzuarit janë dënuar me gjithsej 32 vjet burgim dhe 230 mijë euro gjoba për veprën penale “Krim i organizuar”.
Aktgjykimi i shkallës së parë të gjykatave u shpall më pak se dy muaj pasi Gjykata Kushtetuese pranoi kërkesën e biznesmenit Prishtina dhe obligoi gjykatën që të përshpejtojë procesin e nxjerrjes së një aktgjykimi në rastin e tij.
