Një emër që po shkëlqen në futbollin anglez është shqiptari nga Kosova, Lorent Tolaj.
Sulmuesi 24-vjeçar është aktualisht pjesë e skuadrës Plymouth, që garon në Ligën e Tretë të Anglisë (League One), dhe po kalon një formë të jashtëzakonshme.
Tolaj është ndër golashënuesit më të mirë të ekipit, me 12 gola të shënuar në 23 paraqitje, duke u shndërruar në pikë kyçe të skuadrës së tij.
Paraqitjet e tij nuk kanë kaluar pa u vënë re as nga mediat ndërkombëtare. Radiotelevizioni zviceran, në faqen zyrtare “RTS Sport”, e ka krahasuar shqiptarin nga Kosova me yllin norvegjez Erling Haaland.
“Shpeshherë krahasohet me Haalandin. Lorent Tolaj është golashënuesi i tretë më i mirë në katër kategoritë e para të futbollit në Angli”, ka shkruar faqja e televizionit zviceran.
Në moshën 16-vjeçare Tolaj u largua nga Sioni. Dhe bashkë me familjen e tij u vendos në Brighton të Anglisë. Ishte pjesë e të rinjve të Zvicrës, në grupmoshat U17, U18 dhe U19.
Pas javës së 26-të Plymouth e zë vendin e 14-të me 33 pikë të mbledhura.
Cardiff kryeson me 55 pikë, ka 6 më shumë se Lincoln në pozitën e dytë në ligën me 24 skuadra.
