Ministri në detyrë i Mbrojtjes së Shqipërisë, Pirro Vengu, ka bërë të ditur se ka nënshkruar një marrëveshje bashkëpunimi me homologun francez, Sébastien Lecornu, për modernizimin e kapaciteteve të Forcave të Armatosura të Shqipërisë.
Vengu tha se marrëveshja është rezultat i iniciativës së Kryeministrit Edi Rama dhe Presidentit të Francës, Emmanuel Macron, të cilët kanë ndërmarrë hapa të rëndësishëm edhe në fushat e sigurisë energjetike, turizmit dhe inovacionit.
“Me kujdesin e veçantë të Kryeministrit Rama dhe Presidentit Macron, u hodhën hapa jetësorë në fusha kyçe. Marrëveshja e nënshkruar me mikun dhe homologun Sébastien Lecornu synon forcimin dhe modernizimin e Forcave tona të Armatosura”, shkroi Vengu në një postim.
Ai shtoi se vizita e Macronit në Shqipëri, e mbushur me marrëveshje me rëndësi për ekonominë dhe sigurinë, konfirmon vendosmërinë e Bashkimit Evropian për ta trajtuar Shqipërinë si një partner të besueshëm dhe faktor stabiliteti në rajon.
