Një shpërthim i fuqishëm ka ndodhur në vullkanin Lewotobi Laki-Laki në provincën lindore Nusa Tenggara të Indonezisë, njoftoi Qendra për Vullkanologji dhe Zbutje të Rreziqeve Gjeologjike.
Sipas autoriteteve, shpërthimi ndodhi të hënën në orën 01:05 sipas kohës lokale dhe rezultoi me përhapjen e hirit deri në 18 kilometra lartësi në atmosferë. Retë e gazit dhe hirit u drejtuan poshtë shpateve të malit, duke mbuluar disa fshatra përreth me shtresa të dendura hiri.
Fatmirësisht, nuk raportohet për viktima në këtë ngjarje, por niveli i alarmit ka mbetur në shkallën më të lartë që nga shpërthimi i mëparshëm më 18 qershor. Zona e rrezikut është zgjeruar në një rreze prej 7 kilometrash rreth kraterit të vullkanit.
Vullkani Lewotobi Laki-Laki, me një lartësi prej 1.584 metrash, njihet si “vullkani binjak” së bashku me malin Lewotobi Perempuan. Indonezia, që ndodhet në “Unazën e Zjarrtë të Paqësorit”, përballet shpesh me rreziqe sizmike, pasi ka mbi 130 vullkane aktive.
Ky vullkan shkaktoi nëntë viktima dhe dhjetëra të plagosur në një shpërthim të mëparshëm në nëntor të vitit 2024.
Autoritetet u kanë bërë thirrje banorëve të qëndrojnë të kujdesshëm dhe të respektojnë zonat e ndaluara për sigurinë e tyre.
