Shefi i Zyrës së Rregullatorit për Energji, Ymer Fejzullahu, ka refuzuar të përgjigjet në pyetjet e gazetarëve që ishin të pranishëm në mbledhjen e ZRRE-së, kur ata kërkuan të dinë se sa është rritur çmimi i energjisë elektrike në përqindje.
Gazetarët e pranishëm kanë insistuar që Fejzullahu të shpjegojë në një gjuhë më të thjeshtë për qytetarët e Kosovës se sa është rritur çmimi i rrymës, pasi ai vetëm kishte përmendur shifra të të hyrave të lejuara maksimale.
“A mundemi me e ditë sa është rritja?”, dëgjohet duke pyetur një gazetar.
Ndërkohë, një nga anëtarët e Bordit të ZRRE-së ka thënë se kjo do të sqarohet në një komunikatë të mëvonshme.
Ky diskutim ka ardhur pas miratimit të të gjitha pikave të rendit të ditës nga Bordi i ZRRE-së, përfshirë kërkesat për aprovimin e të hyrave të lejuara maksimale për OST, OSSH dhe FSHU.
