Ministri i Mbrojtjes së Qipros, Vassilis Palmas, ka konfirmuar për mediat se aeroplanë ushtarakë amerikanë të transportit janë stacionuar në ishull, por ka theksuar se nuk bëhet fjalë për asnjë mision luftarak.
Duke folur për transmetuesin shtetëror CyBC, ai deklaroi se avionët ndodhen në Bazën Ajrore “Andreas Papandreu” në Pafos, ndërsa qëllimi i tyre është transporti i personelit, përfshirë ushtarakët amerikanë apo civilët në rast evakuimi.
“Këto nuk janë aeroplanë luftarakë”, sqaroi ministri Palmas. “Ato janë pjesë e bashkëpunimit rutinë dhe përgatitjes për evakuime të mundshme.”
Qiproja, për shkak të vendndodhjes strategjike, është përdorur shpesh si pikë kalimi e sigurt në raste krize në Lindjen e Mesme.
Zëdhënësi i Ministrisë së Mbrojtjes, Christos Pieris, tha për agjencinë CNA se vendi është gati për çdo evakuim të mundshëm përmes planit “Estia”, një mekanizëm humanitar i provuar edhe më parë në situata si krizat në Sudan dhe Liban.
“Kjo nuk ka të bëjë me operacione ushtarake. Kjo ka të bëjë kryesisht me qëllime humanitare, duke mbështetur civilët që largohen nga zonat e konfliktit”, deklaroi Pieris.
Zyrtarët nuk kanë treguar numrin e saktë të aeroplanëve, por konfirmuan se një numër i vogël avionësh transporti janë aktualisht të stacionuar në bazën e Pafos dhe aeroportin e Larnakës si pjesë e masave paraprake.
Ministri Palmas shtoi gjithashtu se Qiproja mirëpret rregullisht avionë dhe forca nga shtete aleate, ndërsa anije ndërkombëtare po monitorojnë rajonin nga ujërat përreth.
Autoritetet thanë se gjatë gjashtë ditëve të fundit kanë ndjekur nga afër situatën rajonale të sigurisë dhe kanë ndërmarrë masa emergjente për të garantuar sigurinë publike.
