Shtetet e Bashkuara besojnë se presidenti rus Vladimir Putin ende nuk ka ndërmarrë kundërpërgjigjen e plotë ndaj sulmit me dron të Ukrainës gjatë fundjavës së kaluar, raportoi agjencia Reuters, duke cituar zyrtarë amerikanë që folën në kushte anonimiteti.
Sipas tyre, kundërpërgjigja ruse pritet të jetë e fuqishme, shumëdimensionale dhe e pabarabartë në krahasim me sulmin ukrainas – duke përfshirë përdorimin e kapaciteteve të ndryshme ajrore, si raketa dhe dronë.
Një nga zyrtarët theksoi se sulmi i Rusisë pritet “brenda pak ditësh”, ndërsa një tjetër deklaroi se reagimi ende nuk ka ndodhur në përmasat që priten.
Të premten, Rusia kreu një valë sulmesh me raketa dhe dronë ndaj kryeqytetit ukrainas, Kiev, dhe Ministria ruse e Mbrojtjes tha se sulmi kishte në shënjestër objektiva ushtarake dhe të lidhura me ushtrinë – si kundërpërgjigje ndaj “akteve terroriste” të Ukrainës ndaj territorit rus.
Megjithatë, zyrtarët amerikanë theksojnë se ky ishte vetëm një hap fillestar dhe se sulmi i vërtetë nga Moska pritet të jetë shumë më i madh dhe i koordinuar.
