Kryetarja e degës së LDK-së në Bayern, Saranda Musliu gjatë ditës së djeshme ishte pjesëmarrëse në tubimin e LDK-së në Olten të Zvicrës.
Përmes një postimi në Facebook, ajo ka shkruar se ka zyrtarizuar kandidaturën e saj për deputete të LDK-së.
“Një emocion i veçantë më ngjalli fakti se ky tubim u zhvillua nën frymën e filozofisë së Presidentit historik Ibrahim Rugova. Vizioni i tij për një Kosovë të lirë, të pavarur dhe paqësore është burimi ynë i përhershëm i inspirimit dhe udhërrëfyesi ynë në çdo hap.
Mërgata dhe Kosova janë të pandashme. Jemi një trup i vetëm, një familje e madhe me një qëllim të përbashkët: forcimin e shtetësisë së Kosovës dhe ndërtimin e një të ardhmeje më të mirë për brezat që vijnë”, shkruan ajo.
Postimi i plotë:
Të dashur bashkatdhetarë, RUGOVISTË të përbetuar,
Sot në Olten të Zvicrës përjetova një ditë të paharrueshme dhe emocionuese. Në mesin e bashkatdhetarëve tanë, pata nderin të zyrtarizoj kandidaturën time dhe të ndaj vizionin tim për të ardhmen. Ishte një ndjenjë e veçantë të shihja një sallë plot energji, mbështetje dhe përkushtim për të mirën e përbashkët.
Një falënderim i veçantë shkon për të gjithë ju që ishit pjesë e këtij momenti, që me praninë dhe duartrokitjet tuaja e bëtë këtë ditë të veçantë edhe më domethënëse. Prezenca e Kryetarit Lumir Abdixhiku, bashkë me bashkëpunëtorët e tij, kryetarë të degëve dhe komunave, si dhe deputetët e pranishëm, i dha këtij takimi një vlerë të veçantë. Me fjalët e tij mbështetëse dhe mesazhin e qartë për unitet, Kryetari na dha kurajë dhe besim për rrugëtimin që kemi përpara.
Një emocion i veçantë më ngjalli fakti se ky tubim u zhvillua nën frymën e filozofisë së Presidentit historik Ibrahim Rugova. Vizioni i tij për një Kosovë të lirë, të pavarur dhe paqësore është burimi ynë i përhershëm i inspirimit dhe udhërrëfyesi ynë në çdo hap.
Mërgata dhe Kosova janë të pandashme. Jemi një trup i vetëm, një familje e madhe me një qëllim të përbashkët: forcimin e shtetësisë së Kosovës dhe ndërtimin e një të ardhmeje më të mirë për brezat që vijnë.
Së bashku, me vendosmëri dhe përkushtim, do t’i arrijmë të gjitha synimet tona. Ky është vetëm fillimi i një rrugëtimi që na bashkon të gjithëve për një Kosovë më të fortë dhe më të drejtë.
Faleminderit nga zemra për besimin dhe përkrahjen tuaj!
