Rusia ka përsëritur qëndrimin e saj kritik ndaj Serbisë lidhur me dërgimin e armëve në Ukrainë, duke lëshuar një paralajmërim të ri përmes përfaqësueses së Ministrisë së Punëve të Jashtme Ruse, Maria Zakharova.
Gjatë një konference në Moskë, Zakharova deklaroi se “Rusia është e bindur se Serbia i kupton rreziqet e rënies së produkteve të saj të kompleksit ushtarako-industrial në duart e Kievit”, duke theksuar se Beogradi zyrtar pritet të ndërmarrë masa efektive për të shmangur këtë skenar.
Rusia ka marrë gjithashtu në konsideratë premtimet e presidentit serb Aleksandar Vuçiq, i cili ka siguruar se Serbia nuk do të lejojë që municionet e prodhimit vendor të përfundojnë në duart e forcave ukrainase.
Megjithatë, Shërbimi i Inteligjencës së Jashtme Ruse ka deklaruar se, pavarësisht pozicionit zyrtar të neutralitetit të shpallur nga Beogradi, fabrikat serbe të mbrojtjes vazhdojnë të furnizojnë municione në Kiev.
