Qeveria e Maqedonisë së Veriut do të punojë me Komunën e Tetovës për ta definuar projektin për ndërtimin e rrugës Tetovë-Prizren. Ministri i Transportit, Aleksandar Nikollovski deklaroi se është e nevojshme të bëhet projektim për të parë nëse mund të realizohet.
“Është e nevojshme të bëjmë projektim dhe kur ta bëjmë projektin duhet ta shohim se cila është vlera reale e asaj rruge, a do të mund të realizohet në mënyrën se si është paraparë dhe nëse është e mundur, ta realizojmë”, tha Nikollovski.
Institucionet në Kosovë tashmë kanë filluar ndërtimin e rrugës që duhet t’i lidhë dy qytetet. Plani fillestar parashikonte ndër tjerash edhe tunel 6 kilometërsh. Kostoja e projektit pritet të jetë rreth 200 milionë euro.
Qeveria e Kosovës disa herë ka bërë thirrje që të mos ketë vonesa në ndërtimin e rrugës nga ana e Maqedonisë së Veriut.
