Rita Ora ka fituar betejën ligjore me fqinjët për ndërtimin e një palestre moderne në kopshtin e vilës së saj luksoze prej 7.5 milionë funtesh (8.5 milionë euro), e cila është e mbrojtur si ndërtesë me vlerë kulturore.
Planet e këngëtares 34-vjeçare ngjallën reagime të forta nga banorët lokalë, të cilët u shqetësuan se objekti do të prishte qetësinë e zonës, raporton DailyMail.
Ata e akuzuan këngëtaren për shkatërrimin e ekologjisë natyrore vetëm për ngritjen e palestrës dhe u shprehën të shqetësuar se dyert e mëdha me xhama do ta bënin objektin më shumë një pavijon ndriçimi dhe zhurme.
Një bllok i tërë banesash afër dorëzoi një ankesë kolektive, duke theksuar: “Banorët që e kanë zgjedhur këtë zonë për qetësinë e saj nuk duhet të detyrohen të jetojnë me ndriçim artificial, muzikë të lartë apo humbje privatësie”.
Ata shtuan: “Edhe pse përmendet izolimi akustik, dyert me hapje të madhe sugjerojnë se muzika dhe zhurmat mund të dëgjohen në çdo kohë. Pronat fqinjë kanë rregulla të rrepta që ndalojnë mbajtjen e tubimeve të mëdha pikërisht për të ruajtur qetësinë. Ky projekt e minon këtë mirëkuptim dhe rrezikon të sjellë konflikte, ankesa dhe madje edhe procese ligjore”.
E gjithë rruga e saj dhe dy rrugë përreth i dërguan bashkërisht një letër autoriteteve, duke e cilësuar ndërtimin e propozuar si një “shëmtim vizual”. Ata kujtuan se vetë Rita kishte folur më parë për rëndësinë e ruajtjes së kopshtit, të cilin e kishte përshkruar si një “strehë për fluturat dhe shpendët”, ku madje ishin parë edhe pallonj.
Në një video në YouTube, këngëtarja kishte treguar me entuziazëm për “parajsën e gjelbër sekrete” të saj, duke thënë: “Vendosim një qilim apo një batanije dhe kalojmë kohë duke shijuar aromën e luleve”. Ajo kishte shfaqur edhe pjesën e kopshtit të fundosur, duke treguar se “aty qëndrojnë fluturat” dhe kishte theksuar se nuk dëshironte të vendoste shumë instalime elektrike në atë zonë sepse “thelbi i saj është të mbetet kopsht”.
Megjithatë, pavarësisht kundërshtimeve të shumta, Këshilli i Camden-it i dha dritën jeshile projektit të këngëtares.
Një burim i afërt me këngëtaren tha për tabloidin britanik The Sun: “Rita nuk ka ndërmend të prishë qetësinë e lagjes. Ajo i ka bërë të gjitha në mënyrë të rregullt dhe nuk do të kishte marrë lejen nëse po shkelte ndonjë rregull urbanistik”.
Përfaqësuesit e Rita Orës nuk kanë dhënë ende një koment për këtë çështje.
