Epoka e përgjakshme e familjes Kadyrov në Çeçeni mund të jetë duke shkuar drejt fundit. Ramzan Kadyrov, 49 vjeç, lideri autoritar i republikës çeçene dhe një nga aleatët më brutalë të Vladimir Putin-it, ndodhet në gjendje shëndetësore të dëshpëruar. Prej kohësh ai vuan nga insuficiencë renale dhe, sipas burimeve ukrainase, gjendja e tij është përkeqësuar ndjeshëm që prej dhjetorit.
Situata komplikohet edhe më shumë nga fakti se djali i tij 18-vjeçar, Adam Kadyrov, i konsideruar trashëgimtari i regjimit dhe tashmë i emëruar ministër i Brendshëm, ndodhet në terapi intensive pas një aksidenti shumë të rëndë automobilistik. Sipas disa zërave, ai është transportuar me urgjencë në Moskë. Nervozizmi në Kremlin është në nivele të larta, pasi suksesi dinastik i regjimit totalitar çeçen është tani në pikëpyetje.
Epoka Kadyrov nisi me Akhmad Kadyrov, babanë e Ramzanit dhe gjyshin e Adamit. Gjatë Luftës së Dytë Çeçene, ish-myftiu tradhtoi kauzën separatiste dhe u rreshtua me Putin-in, duke u bërë president i Çeçenisë në vitin 2003. Ai u vra tre vjet më vonë në një atentat. Pas një lufte të dhunshme për pushtet, Ramzan Kadyrov mori drejtimin dhe nga viti 2007 instaloi një regjim represiv brutal.
Rrëmbime, zhdukje, vrasje të opozitarëve dhe gazetarëve, një aparat spiunazhi gjithpërfshirës, masakra kolektive dhe spastrime të egra kundër komunitetit LGBTQ+ u bënë shenja dalluese të regjimit të njohur si “Kasapi i Groznit”. Kadyrov kultivoi një imazh të dhunshëm, duke u shfaqur me Rolex, kallashnikovë dhe luks ekstrem, ndërsa rindërtoi Groznin me fondet e Kremlinit, përfshirë edhe një xhami gjigante.
Gjatë luftës në Ukrainë, Kadyrov u rikthye në skenë me shfaqje propagandistike: në vitin 2022, njerëzit e tij dështuan në një tentativë për të vrarë Volodymyr Zelensky-n, ndërsa ai vetë pretendonte se ishte në front, edhe pse gazetarët lokalizuan telefonin e tij në Grozni. Megjithatë, batalionet çeçene luftuan realisht përkrah ushtrisë ruse dhe, që nga viti 2023, kanë zëvendësuar pjesërisht mercenarët e Wagner, sidomos në Donbas.
Adam Kadyrov u shfaq për herë të parë publikisht në vitin 2016, kur ishte vetëm 9 vjeç dhe u hodh nga i ati në një ndeshje arteve marciale pa mbrojtje, duke shkaktuar reagime edhe në Moskë. Në moshën 15-vjeçare, ai u filmua duke rrahur brutalisht një të burgosur të pambrojtur, akt për të cilin Ramzan Kadyrov u shpreh “krenar” dhe e dekoroi. Për shumë vëzhgues, kjo ishte ceremonia e kurorëzimit të trashëgimtarit. Sot, gjithçka duket sërish në ajër.
Nëse shëndeti i Ramzan Kadyrov dhe i djalit të tij nuk përmirësohet, Çeçenia dhe Moska mund të përballen me një vakuum pushteti të rrezikshëm, me pasoja të paparashikueshme për rajonin dhe për strategjinë e Kremlinit.
Kush është Adam Kadyrov?
Adam Kadyrov?
Ai konsiderohet si një pasardhës i mundshëm i babait të tij, diktatorit brutal çeçen Ramzan Kadyrov. Por tani, 18-vjeçari Adam Kadyrov thuhet se është në spital me lëndime të rënda. Pas një aksidenti me makinë, gjendja e tij është “serioze”, sipas Radio Europa e Lirë, duke cituar burime anonime.
Babai i tij, Ramzan Kadyrov, është gjithashtu në gjendje të rënduar shëndetësore. Diktatori çeçen thuhet se është në dializë për shkak të mosfunksionimit të veshkave, ndërsa inteligjenca ukrainase, njofton se ai është në prag të vdekjes.
Kremlini thuhet se tashmë po kërkon me dëshpërim një pasardhës të ndihmësit të Putinit.
Është e vështirë të marrësh informacion të besueshëm rreth familjes Kadyrov. Ramzan Kadyrov sundon vendin me brutalitet ekstrem. Besnikëria e tij absolute i qëndron Vladimir Putinit, i cili nga ana tjetër toleron shtetin paralel të Çeçenisë (me popullsi 1.5 milion) brenda Federatës Ruse. Kadyrov mban pushtet absolut, komandon një ushtri private dhe bën një stil jetese ekstravagant. Ai ka të paktën 14 fëmijë, numri i saktë nuk dihet.
Por duket se është po aq e vështirë të marrësh informacion të besueshëm në lidhje me shëndetin e të birit. Radio Evropa e Lirë raporton mbi një aksident me makinë, ndërsa thuhet se Adam është në kujdes intensiv në spitalin më të madh të Çeçenisë në Grozni. Rrugët hyrëse për në spital thuhet se janë të mbyllura. Megjithatë, një burim tjetër raporton se Adam Kadyrov është dërguar me aeroplan në Moskë për trajtim mjekësor. Mediat ukrainase po raportojnë gjithashtu për këtë skenar të mundshëm, duke vënë në dukje se vendndodhja e Adam Kadyrov nuk mund të verifikohet në mënyrë të pavarur.
Adam Kadyrov u bë i njohur për publikun pasi një video u publikua në internet që e tregonte atë duke rrahur një të burgosur ukrainas. Në atë kohë, Adam Kadyrov ishte vetëm 15 vjeç. Pas sulmit, ai u mbulua me çmime, përfshirë titullin “Hero i Republikës Çeçene”.
Në prill 2025, ai u emërua Sekretar i Këshillit të Sigurisë Çeçene, një veprim që nxiti më tej spekulimet se ai mund të pasonte të atin.
Vendimi përfundimtar, megjithatë, nuk do të merret nga vetë Kadyrov, por nga Vladimir Putin.
