Organizata e Veteranëve të Luftës së Ushtrisë Çlirimtare të Kosovës ka reaguar me tone të ashpra ndaj vendimit të Gjykatës së Apelit të Dhomave të Specializuara në Hagë për ish-komandantin e UÇK-së, Pjetër Shala.
Në një reagim zyrtar, OVL-UÇK është shprehur thellësisht e pakënaqur me uljen e dënimit të Shalës, duke e cilësuar të padrejtë dhe politik.
“Edhe pse dënimi është ulur, ne kemi pritur me bindje të plotë një vendim lirues, sepse besojmë në pafajësinë e bashkëluftëtarëve tanë, dhe në luftën tonë të drejtë për çlirim”, thuhet në reagim.
Sipas OVL-UÇK-së, ky vendim nuk përmbyll një padrejtësi, por vetëm sa e thellon atë.
“Ky aktgjykim, në vend që të përmbyllë padrejtësinë, veçse e thellon bindjen tonë se kjo gjykatë ka karakter politik dhe nuk e trajton drejtësinë mbi baza të barabarta e të paanshme”, thuhet tutje.
Ata shtojnë se nuk kanë nevojë të mbrojnë Ushtrinë Çlirimtare nga e vërteta, sepse ajo është në anën e tyre.
“UÇK-ja nuk ka nevojë të mbrohet nga e vërteta. E vërteta historike është në anën tonë dhe bashkëluftëtarët tanë nuk do t’i nëpërkëmbë askush me procese të motivuara politikisht.”
Në fund të reagimit, veteranët përmbyllin me një mesazh të qartë: “Liria nuk gjykohet, ajo respektohet!”
