Presidenti rus Vladimir Putin po i bën presion Teheranit që të pranojë një marrëveshje bërthamore që nuk do t’i jepte mundësinë të pasurojë uranium, sipas faqes së lajmeve Axios.
Qëndrimi zyrtar i Rusisë është se Irani ka të drejtë të pasurojë uraniumin. Megjithatë, Putini ka mbajtur një qëndrim më të ashpër që nga lufta 12-ditore midis Izraelit dhe Iranit.
Moska i ka inkurajuar iranianët të bien dakord për “zero pasurim”, sipas tre zyrtarëve evropianë dhe një zyrtari izraelit të njohur me çështjen.
Dy burime thanë se rusët informuan gjithashtu qeverinë izraelite mbi qëndrimin e Putinit mbi pasurimin e uraniumit nga Irani.
“E dimë që kjo është ajo që Putini u tha iranianëve”, tha një zyrtar i lartë izraelit.
Putini e shprehu këtë qëndrim edhe në telefonatat javën e kaluar me Trumpin dhe presidentin francez Emmanuel Macron.
“Putini do të mbështeste pasurimin zero. Ai i inkurajoi iranianët të punonin drejt kësaj në mënyrë që negociatat me amerikanët të ishin më të favorshme. Iranianët thanë se nuk do ta merrnin në konsideratë”, tha një zyrtar evropian me njohuri të drejtpërdrejta për çështjen.
Pozicioni i Putinit është interesant duke pasur parasysh mbështetjen e gjerë që Irani i dha Rusisë gjatë luftës së saj me Ukrainën, duke përfshirë furnizimin me qindra dronë sulmues dhe raketa tokë-tokë.
