Protestat para Kuvendit të Kosovës do të vazhdojnë edhe sot, ndërsa qytetarë të shumtë pritet t’i bashkohen tubimit për të kërkuar miratimin në lexim të dytë të ndryshimeve në Ligjin për Dhomat e Specializuara.
Tubimi është paralajmëruar të nisë nga ora 09:00.
Një ditë më parë, protesta u shoqërua me tensione të shumta, përplasje mes protestuesve dhe Policisë së Kosovës, si dhe përdorim të mjeteve për shpërndarjen e turmës.
Situata u tensionua pas shtimit të prezencës policore, ndërsa gjatë protestës u përdorën gaz lotsjellës dhe topa uji. Në disa momente pati përleshje mes protestuesve dhe policisë, ku u raportuan edhe persona të lënduar.
Po ashtu, pati edhe arrestime. Në mesin e personave të ndaluar ishte edhe djali i vëllait të ish-presidentit Hashim Thaçi.
Sipas të dhënave të bëra publike pas protestës, 14 persona kanë kërkuar ndihmë mjekësore, ndërsa në mesin e të lënduarve kishte edhe pjesëtarë të Policisë së Kosovës.
Pas përfundimit të përleshjeve, protestuesit u rikthyen në sheshin “Skënderbeu”, aty ku prej 21 ditësh po zhvillohet protesta me moton “Jo në emrin tim”.
Megjithëse nata e djeshme u mbyll me shpërndarjen e protestuesve, ata kanë bërë të ditur se protesta do të vazhdojë edhe në ditët në vijim.
