E ngarkuara me punë e Ambasadës së Shteteve të Bashkuara të Amerikës, Anu Prattipati, të martën është takuar me kryetarët e Mitrovicës së Veriut, Zveçanit, Zubin Potokut dhe Leposaviqit, si dhe me përfaqësues të shoqërisë civile të serbëve të Kosovës në veri të vendit.
Takimi është bërë i ditur nga Ambasada e SHBA-së në Kosovë.
“Ajo ka theksuar pritjet e Shteteve të Bashkuara për qeverisje transparente dhe efektive, ofrim të barabartë të shërbimeve, si dhe rëndësinë e angazhimit me institucionet e sigurisë publike që janë të përkushtuara për t’u shërbyer të gjitha komuniteteve”, thuhet në komunikatën e Ambasadës së SHBA-së.
Ndërkohë, kryetarët shqiptarë në katër komunat veriore, të banuara me shumicë serbe, të premten, më 5 dhjetor, kanë dorëzuar mandatet e tyre kryetarëve të rinj nga radhët e Listës Serbe.
