Japonia është një nga destinacionet më të veçanta për turistët, duke ndërthurur traditën me modernitetin, por dallimet kulturore mund të jenë sfiduese për vizitorët që e vizitojnë për herë të parë.
Nga mënyra e përdorimit të shkopinjve të ngrënies dhe sjellja në transportin publik, deri te rregullat në restorante dhe banjat termale, disa zakone japoneze mund të duken të pazakonta për turistët.
Një nga rregullat më të rëndësishme lidhet me shkopinjtë. Ata nuk duhet të vendosen drejt në tasin me oriz dhe as të përdoren për t’ia kaluar ushqimin një personi tjetër, pasi këto veprime lidhen me ritualet mortore në Japoni.
Ndryshe nga shumë vende të tjera, zhurma gjatë ngrënies së ramenit, sobës apo udonit nuk konsiderohet domosdoshmërisht mungesë edukate dhe mund të shihet si shenjë se ushqimi po shijohet.
Turistëve u rekomandohet gjithashtu të mësojnë disa shprehje bazë japoneze, si “sumimasen”, “onegaishimasu”, “itadakimasu” dhe “goçisousama”, të cilat përdoren në situata të ndryshme dhe shprehin respekt e mirënjohje.
Një tjetër dallim i rëndësishëm është bakshishi. Në Japoni ai nuk është pjesë e zakonshme e kulturës së shërbimit dhe në disa raste mund të konsiderohet i papërshtatshëm.
Në transportin publik pritet qetësi. Telefonatat zakonisht shmangen, ndërsa udhëtarët përdorin telefonat në heshtje dhe me kufje.
Edhe ushqimi gjatë ecjes nuk është gjithmonë i zakonshëm. Në shumë raste, ushqimi konsumohet aty ku blihet ose në hapësira të përcaktuara, megjithëse ka përjashtime, veçanërisht gjatë udhëtimeve me tren.
Një tjetër veçori është menaxhimi i mbeturinave. Pavarësisht se në rrugë mund të ketë pak kosha, pastërtia ruhet duke i mbajtur mbeturinat me vete derisa të gjendet një vend i përshtatshëm për t’i hedhur.
Për ata që planifikojnë të vizitojnë një “onsen”, pra një banjë termale japoneze, duhet të dinë se zakonisht kërkohet larja para hyrjes dhe nuk lejohen rrobat e banjës. Në disa ambiente mund të ketë edhe kufizime për personat me tatuazhe.
Edhe në shkallët lëvizëse ekzistojnë zakone rajonale. Në Tokio dhe pjesën lindore njerëzit zakonisht qëndrojnë në të majtë, ndërsa në Osaka dhe pjesën perëndimore në të djathtë.
Respektimi i këtyre zakoneve nuk është vetëm çështje rregullash, por edhe një mënyrë për të treguar respekt ndaj kulturës dhe njerëzve vendas.
