Në Moldavi janë kryer mbi 200 bastisje lidhur me përpjekjet e dyshuara, të mbështetura nga Rusia, për të destabilizuar vendin përpara zgjedhjeve parlamentare të së dielës, ndërsa presidentja Maida Sandu paralajmëroi se Moska po shpenzonte qindra miliona euro për të ndikuar në votime.
Policia kombëtare tha se hetuesit dhe forcat e sigurisë kishin kryer 250 kërkime kundër më shumë se 100 personave, por nuk specifikoi përkatësinë politike të asnjërit prej objektivave.
“Kërkimet lidhen me një çështje penale për përgatitjen e trazirave masive dhe destabilizimit, të cilat u koordinuan nga Federata Ruse përmes elementëve kriminalë”, tha ajo në një deklaratë të martën.
Në një konferencë për shtyp në kryeqytetin Kishinev, zyrtarët e sigurisë pretenduan se qytetarët moldavë po trajnoheshin në Serbi mbi taktikat e protestës nga operativët e inteligjencës ruse. Autoritetet arrestuan 74 persona si rezultat i kontrolleve, thanë zyrtarët e sigurisë.
Zgjedhjet me rrezik të lartë mund të jenë vendimtare për përpjekjen e Moldavisë për t’u anëtarësuar në Bashkimin Evropian, një proces që Moska thotë se po përpiqet ta prishë përmes taktikave si dezinformimi, organizimi i trazirave masive dhe blerja e votave.
Sandu, e cila i ka përshkruar zgjedhjet e së dielës si ” më të rëndësishme” në historinë e Moldavisë, ka akuzuar Moskën se po zhvillon një fushatë subversive për të ndikuar në rezultatin e zgjedhjeve, me qëllim që ta mbajë Kishinaun brenda orbitës së saj.
Muajin e kaluar, manjati i arratisur Ilan Shor, i cili është sanksionuar nga SHBA-ja dhe BE-ja si një agjent i dyshuar rus, u ofroi hapur moldavëve pagesa mujore prej 3,000 dollarësh për t’u bashkuar me protestat antiqeveritare.
Sandu paralajmëroi se sovraniteti i Moldavisë ishte “në rrezik” dhe se ndërhyrja ruse do të kishte pasoja të gjera për Evropën.
“Kremlini po shpenzon qindra miliona euro për të blerë qindra mijëra vota në të dy brigjet e lumit Nistru dhe jashtë vendit”, tha ajo.
Bashkëkryetari i Bllokut Patriotik pro-rus të Moldavisë, i cili pritet të paraqesë një sfidë të fortë për Partinë pro-evropiane të Veprimit dhe Solidaritetit në pushtet, kishte thënë më parë se disa anëtarë ishin shënjestruar në bastisje.
“Regjimi kriminal i PAS po përpiqet të na frikësojë, të trembë njerëzit dhe të na heshtë”, tha Igor Dodon, një ish-president, në aplikacionin e mesazheve Telegram.
“Qindra kontrolle dhe sulme të përditshme ndaj kolegëve tanë demonstrojnë frikën e Maia Sandu-s nga rezultatet e zgjedhjeve. Ata e dinë se do t’i humbasin këto zgjedhje”, tha ai gjatë një konference për shtyp.
Ndërsa shumica e sondazheve të kryera përpara zgjedhjeve tregojnë PAS në krye, analistët thonë se rezultati i votimit të së dielës është i paparashikueshëm.
Nën presidencën e Sandusë, Moldavia filloi bisedimet e pranimit në BE vitin e kaluar.
Rusia ka mohuar ndërhyrjen në punët e brendshme të Moldavisë dhe thotë se qeveria e Sandusë po nxit ndjenjat anti-ruse për të fituar vota.
Shërbimi i Inteligjencës së Jashtme Ruse (SVR) akuzoi të martën BE-në se ka qëllime “të pushtojë Moldavinë”.
BE-ja dhe NATO-ja janë “të vendosura ta mbajnë Moldavinë në përputhje me politikën e tyre rusofobe”, tha agjencia shtetërore ruse e lajmeve TASS, duke cituar zyrën e shtypit të SVR-së.
“Ata planifikojnë ta bëjnë këtë me çdo kusht, duke përfshirë edhe futjen e trupave dhe pushtimin de facto të vendit. Në këtë fazë, një përqendrim i njësive të forcave të armatosura nga vendet e NATO-s po kryhet në Rumani pranë kufijve moldavë”, tha agjencia.
