Me ardhjen e sezonit të pushimeve, shumë vajza dhe gra të reja përballen me dilemën e shtyrjes së ciklit menstrual për shkak të udhëtimeve, ngjarjeve të rëndësishme apo thjesht dëshirës për më shumë komoditet në plazh. Zgjidhja që zakonisht zgjidhet më lehtë është përdorimi i pilulave hormonale – por sa e sigurt është kjo?
Pilulat hormonale – si funksionojnë?
Këto pilula përmbajnë gestagjene, hormone që pengojnë krijimin e shtresës së brendshme të mitrës dhe kështu ndalojnë fillimin e menstruacioneve. Ato duhet të fillohen disa ditë para datës së parashikuar të ciklit dhe të merren për aq kohë sa dëshironi ta shtyni – por jo më shumë se 14 ditë rresht, këshillojnë gjinekologët.
Përdorimi i tyre për periudha të shkurtra konsiderohet i sigurt në shumicën e rasteve, por vetëm nën mbikëqyrjen e specialistit.
Rreziqet për gratë mbi 35 vjeç
Sipas ekspertëve, gratë mbi 35 vjeç që pijnë duhan, vuajnë nga sëmundje kronike si hipertensioni, diabeti apo çrregullime të mpiksjes së gjakut, duhet të konsultohen patjetër me gjinekologun dhe hematologun përpara se të përdorin këtë metodë.
“Përdorimi i pakontrolluar i hormoneve rrit ndjeshëm rrezikun e trombozës, sidomos te gratë që pijnë duhan ose janë mbipeshë,” paralajmëron Mayo Clinic.
Noti gjatë menstruacioneve – i mundur me mjete të përshtatshme
Ekspertët e Cleveland Clinic sqarojnë se vajzat mund të notojnë pa problem edhe gjatë ciklit menstrual nëse përdorin tamponë higjienikë ose kupa menstruale. Megjithatë, për shumë të reja, shtyrja e ciklit mbetet më komode për të shmangur shqetësimet gjatë pushimeve.
Sa shpesh mund të përdoren pilulat për shtyrje?
Gjinekologët paralajmërojnë që kjo metodë nuk duhet të kthehet në zakon të përhershëm. Rekomandohet të përdoret jo më shumë se 2–3 herë në vit, pasi përdorimi i shpeshtë mund të shkaktojë:
Dhimbje koke
Të përziera
Luhatje tensioni
Ndjeshmëri në gjoks.
Sipas Royal College of Obstetricians and Gynaecologists (RCOG), përdorimi i shpeshtë mund të ndikojë në çrregullimin e ciklit menstrual në periudhë afatgjatë.
